শিব তান্ডব স্তোত্র

জটাটবীগলজ্জলপ্রবাহপাবিতস্থলে
গলেবলংব্য লংবিতাং ভুজংগতুংগমালিকাম্ ।
ডমড্ডমড্ডমড্ডমন্নিনাদবড্ডমর্বয়ং
চকার চংডতাংডবং তনোতু নঃ শিবঃ শিবম্ ॥

জটাকটাহসংভ্রমভ্রমন্নিলিংপনির্ঝরী
বিলোলবীচিবল্লরীবিরাজমানমূর্ধনি ।
ধগদ্ধগদ্ধগজ্জ্বলল্ললাটপট্টপাবকে
কিশোরচংদ্রশেখরে রতিঃ প্রতিক্ষণং মম ॥

ধরাধরেন্দ্রনন্দিনী বিলাসবন্ধুবন্ধুর
স্ফুরদ্দিগন্তসন্ততিপ্রমোদমানমানসে ।
কৃপাকটাক্ষধোরণীনিরুদ্ধদুর্ধরাপদি
ক্বচিদ্দিগম্বরে মনো বিনোদমেতু বস্তুনি ॥

জটাভুজংগপিংগলস্ফুরত্ফণামণিপ্রভা
কদম্বকুঙ্কুমদ্রবপ্রলিপ্তদিগ্বধূমুখে ।
মদান্ধসিন্ধুরস্ফুরত্ত্বগুত্তরীয়মেদুরে
মনো বিনোদমদ্ভুতং বিভর্তু ভূতভর্তরি ॥

সহস্রলোচনপ্রভৃত্যশেষলেখশেখর
প্রসূনধূলিধোরণী বিধূসরাংঘ্রিপীঠভূঃ ।
ভুজংগরাজমালয়া নিবদ্ধজাটজূটক
শ্রিয়ৈ চিরায় জায়তাং চকোরবন্ধুশেখরঃ ॥

ললাটচত্বরজ্বলদ্ধনঞ্জয়স্ফুলিঙ্গভা
নিপীতপঞ্চসায়কং নমন্নিলিংপনায়কম্ ।
সুধাময়ূখলেখয়া বিরাজমানশেখরং
মহাকপালিসম্পদেশিরোজটালমস্তু নঃ ॥

করালফালপট্টিকাধগদ্ধগদ্ধগজ্জ্বল
ধনঞ্জয়াধরীকৃতপ্রচণ্ডপঞ্চসায়কে ।
ধরাধরেন্দ্রনন্দিনীকুচাগ্রচিত্রপত্রক
প্রকল্পনৈকশিল্পিনি ত্রিলোচনে মতির্মম ॥

নবীনমেঘমণ্ডলী নিরুদ্ধদুর্ধরস্ফুরৎ
কুহূনিশীথিনীতমঃ প্রবন্ধবন্ধুকন্ধরঃ ।
নিলিংপনির্ঝরীধরস্তনোতু কৃত্তিসিন্ধুরঃ
কলানিধানবন্ধুরঃ শ্রিয়ং জগদ্ধুরন্ধরঃ ॥

প্রফুল্লনীলপঙ্কজপ্রপঞ্চকালিমপ্রভা
বিলম্বিকণ্ঠকন্দলীরুচিপ্রবদ্ধকন্ধরম্ ।
স্মরচ্ছিদং পুরচ্ছিদং ভবচ্ছিদং মখচ্ছিদং
গজচ্ছিদাংধকচ্ছিদং তমন্তকচ্ছিদং ভজে ॥

অগর্বসর্বমঙ্গলাকলাকদম্বমঞ্জরী
রসপ্রবাহমাধুরী বিজৃম্ভণামধুব্রতম্ ।
স্মরান্তকং পুরান্তকং ভবান্তকং মখান্তকং
গজান্তকাংধকান্তকং তমন্তকান্তকং ভজে ॥

জয়ত্বদভ্রবিভ্রমভ্রমদ্ভুজংগমশ্বাস
দ্বিনির্গমত্ক্রমস্ফুরত্করালফালহব্যবাট্ ।
ধিমিদ্ধিমিদ্ধিমিধ্বনন্মৃদঙ্গতুঙ্গমঙ্গল
ধ্বনিক্রমপ্রবর্তিত প্রচণ্ডতাণ্ডবঃ শিবঃ ॥

দৃষদ্বিচিত্রতল্পয়োর্ ভুজংগমৌক্তিকস্রজোর্
গরিষ্ঠরত্নলোষ্ঠয়োঃ সুহৃদ্বিপক্ষপক্ষয়োঃ ।
তৃষ্ণারবিন্দচক্ষুষোঃ প্রজামহীমহেন্দ্রয়োঃ
সমং প্রবর্তয়ন্মনঃ কদা সদাশিবং ভজে ॥

কদা নিলিংপনির্ঝরীনিকুঞ্জকোটরে বসন্
বিমুক্তদুর্মতিঃ সদা শিরঃস্থমঞ্জলিং বহন্ ।
বিমুক্তলোললোচনো ললাটফাললগ্নকঃ
শিবেতি মন্ত্রমুচ্চরন্ সদা সুখী ভবাম্যহম্ ॥